اسمع مني كلام نسيته
أو تقدر تقول لغيته
بصراحة انا حافظه صم
بس م الخوف رميته
مرة تانية رجعت أقوله
لما فـ دماغي لقيته
ولقيت خوفي ملوهش معنى
دوست عليه أنا وعديته
اسمع مني كلام كتير
قولي رايك لو حبيته .
ـــــــــــــــــــــــــــــــــــــــ
الامان يعني ألاقي
لقمة ياكلوها ولادي
وأرض أبني عليها عمري
وحاكمها يبقى تحت أمري
مش أكون خدام سعادته
وياخده مني ويبقى عادي
سرقوني ولما اشتكيت
قالوا كل كلامي فاضي
وكبيرهم قال الأرض أرضي
والبلد دي عقودها عندي
واللي منها ما اشتريه
ورثته عن أبويا وجدي
بص شوف فتح عنيك
كل الناس شغالة عندي
وصك عبودية أبوك
وكمان اللي خلفوه
لسه موجود جوا درجي
يبقى انت والعيال
شئ طبيعي من عبادي
شوفتوا بقي لما اشتكيت
لقيت الجاني أصله قاضي
حكم عليا بعمري كله
اكون فـ سجن تحت امره
ما هو الحاكم بأمره
أصله قاضي وحكمه ماضي
واتسجنت وآه يا زلي
لما يكون سجني ..... بلادي
عرفت ليه ما فيش أمان
ولا ضحكة ولا اطمئنان
بس سكوت وظلام وخوف
واللعب على المكشوف
واللي يعمل عنتر زمانه
ويفكر ال مكان مكانه
وكأنه م الغيبوبة فاق
هيقولوا عليه مغرور
وع السجن يكون مجرور
ومصير كمان محتوم
تعرف حد اسمه (أ... نور)؟
وبعد يدوبك غلوة واحدة
هيمضي على الأوراق
عنوانها ... عارفه وقريته
الجبن سيد الأخلاق
ــــــــــــــــــــــــــــــــــــــــــــــ
(موضوع منفصل)
الحيط ما عدش مدارينا
شقيناه ومشينا فيه
دعوة امي راحت عليها
كات بتقول يا حيط داريه
وعجبي
الــغــريــب