الــكـابوس

كل احلامي جميلة

حلم واحد كان كابوس

حطيت ايدي جوا جيبي

طلعت بس بدون فلوس

روحت لزقت في السرير

وقعدت أفعص ف الناموس

ما معيش حق المبيد

غلبان .. ف السوق جديد

الكبار وقفولي حالي

وهربت من بين عيالي

ما معيش .. هات ما فيش

طب بس عيش

ماتلاقيش

الدمعة فرة من عيوني

قعدت ألعن في الوحوش

والناس ال  ما يرحموش

جه حرامي وقف قصادي

عينه عليا وف ايده موس

شق جيبي قال يا حبيبي

معكش حتى حق الغموس

فين البرادس فين المصاري

فين الورق فين الفلوس

ضحكت لما روحي طلعت

قلت اما صحيح موكوس

مع آخر نفس نطقته

قلت الفلوس مع التيوس

صعبت على الحرامي جابلي

كفن وصرف على الجنازة

قالوا محسن قالوا صالح

قالوا يسد وقت عوزة

ما يعرفوش اني ضحية

وانه كان راسم عليا

الكل مع الموجة ماشي

واللي يقع مالُهش عازة

يا زمن كده ليه كاوينا

نار وقايدة تشوي فينا

اشمعنى احنا تبتلينا

قالي لحقنا خلاص نسينا

ما احنا م الاول رضينا

ان الوضع يكون معكوس

واهي حجة وقالوها لينا

ومكتوبة بمية عنينا

السعادة مش ف الفلوس

والفلوس مع التيوس

شاهد عيان /             

الـغـريــب